Jinhe Yakin Nahin Tha
Duration: 00:19:07; Aspect Ratio: 1.333:1; Hue: 345.911; Saturation: 0.072; Lightness: 0.161; Volume: 0.290; Cuts per Minute: 1.255; Words per Minute: 152.818
Devki: Raja ne to ehlaan kara diya.
Munadiwala: Suno suno suno! Jo koi bhi is fakeer ko raja ke mehal mein lekar aaega woh muh maanga inaam paega. Suno suno suno.
Shivcharan: Lekin wo fakeer raja ke mehal mein nahi gaya hoga.
Sab: Kyun?
Shivcharan: Kyuki wo ek sacha peer tha.
Devki: Haan Chacha. Reyiasat ne unhe kahee lalach diye, Khoob minnatein kee, lekin woh na maane. Unka to bas ek hee kehna tha.
Fakeer: Chodh mann hari vimukh ko sang. jinke sang kubudhi upjat hai, parat bhajan mein bhang. Chodh mann hari vimukh ko sang.
Chandan: Oye idea! is fakeer kee mulakat na apne gulam se kara dete hain.
Sab: haan haan kara do. Pehle bageecha to banao (sab baag banate hain aur gulaam kaam karta hai)
TV_protest songs
Flute
Baljinder: Shyam ka waqt tha. Panchi, parinde apne ghosle mein laut rahe the. Din bhar ke hare hue fakeer jab us baag mein pahunche jahan gulaam kaam kar raha tha,
to itne khoobsurat phool aur itne raseele phalon ko dekhkar fakeer khushi se jhoom utha. Unka gaana sunkar gulam khushi se jhoom utha. Lalalalala... Jab fakeer kee aankh khuli....
Gulaam: Baba aapka gaana sunkar to din bhar kee thakaan dur ho gayee.
Fakeer: Thakaan toh itne khubsoorat phool aur raseele phalon ko dekhkar khud be khud mit jaatee hai. Kya tum mujhe is baag ke maali se milwa sakte ho?
Gulaam: Kyu Baba?
Fakeer: Main un kamarth haathon ko chumna chahta hoon. Us sirjanhare se milna chahta hoon jisne is kainaat ko noor baksha hai.
Gulaam: Par baba is baag ko to maine lagaya hai.
Fakeer gulam ke haathon ko chumta hai.
Gulaam: Yeh kya kar rhe hain aap baba! Main toh neech hoon, papi hoon. Isliye toh main is janam mein gulaam hoon.
Fakeer: Awwal Allah noor upaya kudrat de sab bande, ek noor se sab jag upjaya kaun bhale kaun mande.
Gulaam: Kaun bhale kaun mande! Ye aap kaisee baatein kar rhe hain baba?
Fakeer: Arey bhai, main toh us shrishti kee baat kar raha hoon jisse tumne racha hai.
Gulaam: Par baba ye sab toh maharaj ka hai.
Fakeer: Lekin lagaya toh tumne hai.
Gulaam: Baba aap mere ghar chalenge.
Fakeer: Haan Haan kyu nai.
Dono jaate hain.
Raja: Tujhe wo fakeer kahan mila tha?
Gulaam: Maharaj apne baage mein.
Raja: Apne baag mein nahi hamare baag mein.
Gulaam: Jee Maharaj.
Raja: Kya keh raha tha woh?
Gulaam: Maharaj woh mere phoolon aur phalon kee tareef kar raha tha.
Raja: Humaare phool, humaare phal.
Gulaam: Jee maharaj. mein bhii baba......
Raja: Aankhen neechee rakh kutte.
Gulaam: Jee maharaj mein bhi unse yehi keh raha tha ke yeh sab to maharaj ka hai
Raja: phir usne kya kaha?
Gulaam: Unhone kaha magar isse lagaya to tune hai.
Raja: Tune lagaya toh tere ho gaye?
Gulaam: Esaa maine kab kaha maharaj.
Raja: Phir kya hua?
Gulaam: Maharaj woh mere ghar aaye.
Raja: Us jhopde mein jo humne tujhe rehne ke liye diya.
Gulaam: Jee maharaj.
Raja: Kya Karne gaya tha wo wahan.
Gulaam: Maharaj woh wahan khaana khaane aaye the.
Raja: Tune toh usse chappan bhog padosen honge?
Gulaam: Mere yahan chappan bhog kahan maharaj? Maine toh usse do sukhi rotiyan khilai.
Raja: Woh sukhi roti jo hum apne kutton ko phekte hain.
Gulaam: Jee Maharaj.
Raja: Tune humaara ehlaan suna tha?
Gulaam: Jee maharaj.
Raja: Toh us fakeer ko humaare yahan kyun nahi laaya?
Gulaam: Par Maharaj woh toh aap hee ke yahan aaye the.
Raja: Kya Bhoonkta hai
Gulaam: Maharaj, woh baba ne mujhse kaha- Main tere yahan aaya matlab raja ke yahan aaya. Agar raja yeh baat samajh jaye to wo dhanya hai.
Raja: Zubaan ladata hai haraamzade. Tu Jaanbhujkar us fakeer ko humaare yahan nahee laya. Tu humse badla lena chahta tha kyuki humne tujhe pitwaya, baag mein aag lagaai. Tu nahi chahta humaara vansh aage bade. Sipaiyon! is haraamzade ko maar maarkar bhus bhar do.
Gulaam: aaaaa(crying in pain).
Baljinder: Yeh kya baat huee? Pichlee baar to gulaam ne ek phal bhi liya tha. Is baar to Gulaam ne kuch bhi nahee kiya tha, Phir bhi raja ne usse itna maara. Main to kehta hoon ye raja papi hai, hatyai hai, atyachari hai. Aise saza to koi janwaron ko bhi nahee deta. Main toh kehta hoon ye raja narak mein jaega.
Batesar: Haan Baljinder! Main jaonga us gulaam ke pass. Usse kahnoga, Oye Gulam, le chal mujhe us raja ke pass. Main us raja ko na bahut marunga. Uske na kameez fadh donga.Uske pant utardunga. Usse nanga karke na jungle mein phank dunga.
Karma: Yeh toh wohi hua na ke gira ghode se aur gussa sise pe. Arey, Raja ko ghud se bacha nahe ho raha tha, aur gulaam ko maar maar ke haalat kharab kar dee.
Devki: Lekin Karma tau, agar gulaam fakeer ko raja ke mahal mein le jata, toh ho sakta hai rani ko bacha ho jaata.
Baljinder: Agar, raja ko bacha nahi ho raha tha, toh kya woh gulaam ko maar-marker uski jaan le leta?
Chandan: Abey! agar Raja se bacha nahi ho raha tha toh Shabbo bua ka ek launda god hee le leta.
Shabbo: Ek kyun, charon ko god le leta. Aur sang mein mujhe bhi le leta.
Karma: Haan marna tha na usko?
Baljinder: Has lo has lo! Us gulaam bechare ko itnee maar padhi aur tum has rahe ho.
Chandan: Abey achee maar padee gulaam ko. wo jaanbhujkar fakeer ko raja ke pass nahi leke gaya tha. Woh raja se badla lena chahta tha.
Baljinder: Wo bechara kya badla leta. Wo to seedha sadha tha, Bhola Bhala tha apne batesar kee tarah.
Chandan: Wo koi seedha sadha, Bhola Bhala nahi tha batesar kee tarh. Woh toh meesna tha meesna teri tarah. Baljinder, woh kahani yaad kar.
Baljinder: Haan, bata kahani.
Chandan: Jab Raja ne gulaam se pucha - "Tu us fakeer ko mere yahan kyu nahi leke aaya?" Toh gulaam ne kaha- "Maharaj baba ne mujhse kaha- mein tere yahan aaya matlab raja ke yahan aaya. Aisee baat karne vale bade kaiyan hote hai, shatir ek number ke.
Baljinder: Woh toh Raja ko izzat baksh raha tha.
Karma: Khak izzat baksh raha tha. Arey, maar se toh ache-ache ke bhoot bhaag jaate hain. usne bhi darr ke mare keh diya hoga.
Batesar: Ae Karma tau tu bada chalak hai. Kabhi raja kee taraf ho jaata hai kabhi gulaam kee taraf.
Shabbo: Batesar, main is Karma ko khoob jaano. Hamesha dhul-mul, dhul mul kabhi idhar to kabhi udhar. Thali ka bengan na ho to.
Karma: Bhai main toh sirf kahani kee baat keh raha tha.
Shabbo: Kahani kee baat karo toh seedhe se baat hai, saree galti us fakeer kee the.
Sab: Kaise?
Shabbo: Agar fakeer itna hee himayati tha gulaam ka, toh wo khud kyu nahi chala gaya raja ke mahal mein? Kam se kam bechare gulaam ko itnee maar to na padti.
Baljinder: Kya Shabbo bua? Tum hamesha raja kee taraf se bolti ho. Aise kaise chala jaata fakeer raja ke pass? woh aajkal ke santo jaisa nahi tha. kya naam hai uska?
Shivcharan: Asaram.
Baljinder: Haan, woh Asaram kee tarah nahi tha joh politician kee peeche jutee ghiste phirte ho. Woh sache fakeer the. Unke kuch usool the ek falsafa tha.
Shabbo: Haan bade unche usool aur unse nhi uncha unka falsafa. Khud to ho gaya fakeer goli aur maar padhi us bechare gulaam ko. Bilkul tumhare comrade Shyamlal kee tarah, Bhashan dekar khud to ho jaate hain goli aur jab lathi chalti hai to hum mazduroon ke seene pe.
Batesar: Ae, comrade Shyamlal kahin goli nahi hote. Pichle hadhtal mein bhi na sabse pehli lathi unhee ke sar pe padhi thee. Phir bhi lal jhanda leke sabse aage the. Aur dekh lena abhi tak unhone lal jhanda bhi lagwa diya hoga haan. Main dekhne jaa rha hoon.
Chandan: Kyu be! lag gaya tera lal jhanda.
Devki: Jhanda na lagne ka, likhwa lo mujhse.
Karma: Arey jhande ke intezaar mein sukh ke kaanta ho jaega. Par jhanda na lagwa paega.
Batesar: Haan thik hai lag jaega jhanda subah tak laga denge comrade.
Shivcharan: Ek swaal mera bhi hai
Sab: Kya?
Shivcharan: Agar Gulaam fakeer ko raja ke pass le jaata, toh kya usko inaam mil jaata.
Sab: Kyu nahi? pata nahi. Ho sakta hai. Shayad.
Baljinder: Bilkul nahi milta, chacha. Woh jo raja the na aaj kal ke malikon ke tarah the. Koi na Koi bahana banakar rakh leta uska inaam.
Devki: Par Baljinder, ho sakta hai ke rani inaam de deti.
Baljinder: Haan rani aaee bade dilwalee.
Chandan: Rani inaam de na de. Raja zaroor de deta.
Shabbo: Abhi thodi der pehle toh tu kuch aur keh raha tha.
Chandan: Suno. Agar main raja hota toh mein kehta "tu mera gulaam. Toh tera inaam mera."
Sab:(Haste hue)
Batesar: Chodh na iskee baatein. Devki tu kahaani suna ye to pagal hai.
Devki: Din, maheene, sal beet gaye lekin raja rani ko bacha nahi hua. Unhone tarah tarah kee tarkeebein kee.
Sab: Kya?
Devki: Rani ne lomdhi ke nakhoon se apna shringaar kiya.
Shivcharan: Raja ne saanp kee jeeb khai.
Baljinder: Raja aur rani ne khajjor ke pedh par chadkar, ulta latakar kaajo katre.
Karma: Raja aur rani ne kai dino tak chochundar ka achaar khaaya.
Batesar: Phir toh bacha ho gaya hoga na.
Devki: Chal! Aise thode hee na hote hai bache.
Batesar: Ah! Phir kya hua?
Devki: Phir us riyasat mein ek tantrik aaya.
Tantrik: Bam Bam Bam Bam...............
Raja: Maharaj humaare yahan koi aulaan nahi hai. Kripa koi Upaay bataie.
Tantrik: Haan Hai ek Upaay. Ek das babrah saal kee kanya lao. Aur uske pehle mahine ke panchve din devi ke mandir mein uski bali chadao. Aur thik do mahine ke baad ek sundar putra pao. Bam bam bam bam...........
Baljinder: Phir talaash shuru hue ladki kee.
Sab: Yahan dhunda wahan dhunda kuch na chuta.
Chandan: Sabhi chukidaaro ko bulaya gaya.
Shivcharan: Sabhi sarpanchin ko bulakar puch-taach kee gayee.
Shabbo: Sabhi gaon mein khoj kee gayee.
Devki: Aas pass kee sabhi riyaasat mein ghode dauda diye gaye.
Baljinder: Phir bhi nahi milee ladki.
Sab: Raja aur rani ke dil par bijlee kadkee.
Baljinder: Raja bahut julaaya. Agle hee din sipaye ek khabar laya.
Sipayee: Maharaj ke jai ho. Maharj, gulaam ke beti barah saal kee ho gayee hai. Aur uska pehla maheena abhi suru nahi hua.
Raja: Shabaash! Bahut achee khabar lae ho. Ye lo pachas swaran mudraen. Apne bachon ko mithai khilaana. Jao aur us gulaam ko humare darbar mein pesh karo.
Sipayee: Jo aagya maharaj.
Raja: Waah gulaam wah. Tu to dhanya ho gaya. Teri jagaah ab swarag mein pakee.
Gulaam: Maharaj ye aap kya keh rahe hai mujhe kuch samajh nahi aa raha maharaj.
Raja: Debi maan kee kripa se humare yahan aulaad peda ho saktee hai. Lekin woh hoga jab hum devi maa ke charno mein teri beti ke bali chadaene.
Gulaam: Maharaj meri bachee ke bali mat chadaie maharaj. Meri bali chada le jiye par meri bachee ke nahi maharaj.
Raja: Arey gulaam agar teri bali chadhane se humare yahan aulaad peda hotee toh kab ke chada dete. Hume aulaad hoge teri beti ke bali chadhane se. Ab jaa aur usse lekar aa.
Gulaam: Jo aagya maharaj.
Baljinder: Yeh kya baat huee. Gulaam itnee asaani se apnee beti ki bali chadhane ko razee ho gaya?
Shabbo: Baljinder woh gulaam hee to tha. Uske pass aur koi chaara bhi toh nahi tha.
Baljinder: Yeh baat toh samajh mein aati hai ke raja ka gulaam par hak tha. Lekin raja ka gulaam ke beti par bhi hak tha kya?
Shabbo: Gulaam akele he raja ka gulaam nahi tha gulaam ka pura parivar raja ka gulaam tha.
Devki: Shabbo bua, ek aurat kee wajah se ek ladki ke bali? Rani kee wajah se gulaam kee beti kee bali? Yeh baat kuch theek nahi lagee.
Karma: Devki yeh baat ladki aur aurat kee nahi hai, Yeh baat hai raja aur gulaam ke. Raja aur rani ke liye gulaam aur uska parivar janvaron se bhi bhatar hota hai.
Shivcharan: Bhai ek sawal mera bhi hai. Tumhe raja aur gulaam mein se ek koi banna padhe to tum kya banna pasand karoge - raja ya gulaam.
Chandan: Abey hehehehe. Abey chacha kya swaal kar raha hai kya banoge - raja ya gulaam? Bhai hum toh raja he banenge na! Raja ke kitne thaat the kitne thaat baat the. Hum toh banenge raja.
Devki: Chacha, Raja to bada he atyachari tha, aur gulaam ko padti the maar. Kuch aur nahi ban sakte kya.
Shivcharan: Na na! Raja ya gulaam.
Devki: Phir toh main banongi raja.
Shivcharan: Kyun?
Devki: Kyuki raja ko koi kaam nahi karna padta tha. Na kapde dhone padte, na bartan manjane padte, na khaana pakana padta, na hee is muee factory mein kaam karna padta. Uske toh dher saare naukar chakar the, joh karte din bhar kaam aur raja karta sirf aaraam.
Karma: Bhai Shivcharan, waise toh raja tha bada atyacharee aur gulaam ke jaan ko bhi fajiyat the, lekin hum banenge haha raja.
Shivcharan: Kyun?
Karma: Kyun hum koi raja se kam thoda hain.
Shabbo: Bhai main toh tang aa chuki ho ye gulaamee karte-karte. Kabhi us pati ke gulaame karo, Kabhi bachon kee aur kabhi is muee factory ke. Mujhe toh is gulaam shabd se he nafrat hai. Main toh banonge raja.
Chandan: Haan toh Shabbo bua, Toh bhi na yahin aajaa, sare raja yahin baithe hain.
Shabbo: Toh is muin karma ko wahan kyu chodh diya. Isne bhi toh raja banna he china hai.
Chandan: Abey bua, woh toh thali ka bengan hai aaj udhar ludak gaya.
Karma: Main bhi aa jaata hoon tumhare pass.
Shivcharan: Bhai sab raja he banoge koi gulam nahi banega?
Shabbo: Is batesar se puch le.
Shivcharan: Kyun batesar tu banega gulaam?
Batesar: Nahi nahi! Main gulaam nahi banunga.
Shivcharan: Phir kya banega?
Batesar: Mujhe nahi pata. Main na jhanda dekhne jaa raha hoon. Jhanda lag gaya hoga.
Devki: Bua! Mujhe ulti aa rahi hai.
Shabbo: Toh wahan jaake kar na. Mujh par karegee kya!
Shivcharan: Baljinder tum badee der se chup-chap khade ho. Tum kya banna pasand karoge? Raja ya gulaam?
Baljinder: Chacha main gulaam banunga.
Batesar: Eh Devki woh dekh.
Devki: Jhanda lag gaya kya?
Batesar: Nahi woh tare dekh. Kitna sundar hai na.
Devki: Haan sachmuch.
Shivcharan: Kyun yahan pe sab raja banenge tum akele gulaam kyu banoge.
Baljinder: Gulaam ke haathon mein jaadu tha.
Batesar: Yeh tara kitna jadui lag raha hai na.
Devki: Haan Batesar meri nani kehti hai ke agar koi gharbwati aurat Toh usse sundar bacha peda hota hai.
Baljinder: Woh ek vaigyanik bhi tha.
Devki: Ye shukr hai. Bhor ka tara, yaani subah jaldi hogee.
Baljinder: Tarah-tarah ke woh rozana avishkaar kiya karta tha.
Batesar: Eh Devki main haath badhakar is tare ko pakad ln kya?
Devki: Nahi Batesar tu gir jaega.
Batesar: Eh Devki woh dekh gate pe kya ho raha hai.
Baljinder: Isliye main gulaam banunga.
Chandan:"Gulaam banunga". Abey kitne mehnat karta tha, Tu kar sakta hai gulaam jitne mehnat. Hein bata?
Baljinder: Haan kar sakta hun mehant.
Batesar: Eh Devki ye dekh comrade shyamlal hain. Main unke topi pehchanta hoon. Unke saath na wo Suresh hai. Eh Devki dekh jhanda lagane aaen hai. Haan comrade Kar do........
Devki: Security wale jaag jaenge chup kar.
Baljinder: Tu marna chahta hai mujhe! Aa maar le! Tu mujhe maarte maarte thak jaega lekin main maar khaate-kaate nahi thakonga. Yehi farak hai tere mein aur mere mein. Tu maar sakta hai aur main maar kha sakta hoon. Aur koi farak nai hai. Tu bhi gulaam hai aur main bhi gulaam hun. Hum sab gulaam hain.
Batesar: Haan comrade woh peeche security wala hai. Comrade ke sir par danda maar diya. Haan Suresh tu jad jaa. Gate pe jad jaa chad chad jaa aur jhanda laga de. Oye Suresh ne laga diya jhanda. Comrade ne jhanda lagwa diya, oye comrade ne......
Shabbo: Chandan! Kya keh raha hai ye?
Chandan:Bua sach keh raha hai inhone to sach much jhanda laga diya.
Baljinder: Sachee mein bua. Maine khud dekha apnee aankhon se jhanda lag gaya.
Karma: Arey jhanda lag gaya to kya hua?
Devki: Lekin Karma tau ye bhi toh dekho kitnee bahaduri se lagaya inhone jhanda.
Chandan: Haan laga diya jhanda to kaunsa teer maar diya. Jhanda toh pehle bhi laga hua tha. Jhanda lagane se kaunse duniya badal jatee hai.
Devki: Lekin Chandan hum toh yeh hee keh rahe the na kee ek baar utra hua jhanda dobara nahi lag sakta. Lekin jhanda toh lag gaya toh duniya kyu nahee badal saktee?
Baljinder: Haan-haan Chandan bata duniya kyun nahi badal saktee?
Chandan: Tu bakwaas mat kario. Pit jaega abhi.
Shabbo: Baljinder tu to bake hee mat. Abhi thodi der pehle tune hee kaha tha ke hum sab gulaam hain. Yaad rakh tu bhi gulaam hai, ye Devki bhi gulaam hai aur uska hone wala bacha bhi.
Devki: Nahi! Mera bacha gulaam nahi rahega. Main bahar jaa rahe hoon.
Karma: Devki, bahar jaane se kya hoga? Bahar jane se kya tum gulaam nahi rahogee? Hum sab majdoor hai aur majdoor humesha gulaam rehta hai. Chahe wo factory ke bahar ho ya andar.
Batesar: Nahi! Jo bahar hai wo gulaam nahi hai. Comrade Shyamlal gulaam nahi hai. Joh jhanda uthata hai, Jhanda lagata hai, Joh lal jhanda leke chalta hai wo gulaam nahi hota.
Chandan: Oye! Security walon ne Comrade Shyamlal ko compound mein ghaseeth liya. Bahut bure tarah se pitayee kar rahe hai unkee.
Batesar: Comrade ko maar rahe hain! Toh main bahar jaa raha hoon.
Shivcharan: Batesar ne apna faisla le liya hai. Ab humare samne ye sawal nahi hai ke hum raja banenge ya nahi. Humare samne ye sawal hai ke hum gulaam rahenge ya nahi. Batesar chal pada hai. Ab hume ye te karna haike hum andar rehkar gulaam rahenge ya bahar jaker lal jhanda uthaenge.
Woh kahenge na hoga is shab ka sawera
Yakin na karna Yakin na karna
Wo kahenge uglega suraj andhera
Yakin na karna Yakin na karna.
Woh kahege kali dhup raat mein
akele ho tum, akele ho saare
Woh kahenge haath roshni ka na thamo
Tare nahi, milenge angaare.
Woh kahenge, andhera tumhara karm hai,
Yakin na karna Yakin na karna.
Woh kahenge, ye subah mithya bharm hai,
Yakin na karna Yakin na karna.
Woh kahenege andere ke jashn manao, fayda uthao
Yeh syahee toh maukon se bhari hai.
Woh kahenge ujaale kee law na lagao na khud ko jalao
subah ke suraj kee dhup kadee hai.
Woh kahenge ye raat tal na saktee.
Yakin na karna Yakin na karna.
Woh kahenge ye duniya badal na saktee,
Yakin na karna Yakin na karna.
Doston ye tha humara nukkad natak. Ab humare sathee aap logon ke beech mein aa rahe hain, meri aapse guzarish hai kee chanda deke humaree mada ke jiye. Shukriya.
Pad.ma requires JavaScript.
